Blogger do Mirandês

ENSINO (2)

Stado actual, necessidades i perspetibas ne l ansino de l mirandés

(Comunicaçon apersentada no X Alcuentru Internacional Llingua Minoritaria y Educación “Llingua y lliteratura nes aules”, ourganizado an 2004 por l'Escuela Universitaria de Maxisteriu de Uviéu i l'Academia de la Llingua Asturiana.)

Carlos Ferreira[1]

I. Antroduçon

II. L ansino de l mirandés

II.1. Antes de l' oufecializaçon de la lhéngua

II.2. Apuis de l’oufecializaçon de la lhéngua

III. Perspetibas feturas

IV. Cunclusones

I. Antroduçon

1. Zde to la bida las lhénguas se trasmitírun i ansinórun. Uas por uas rezones, outras por outras, muitas fúrun quedando pul camino i bíben anfrisgadas andrento de nuobas lhénguas que nacírun de las sues cinzas adubadoras.

Ne l mundo de l seclo XX i XXI la globalizaçon i masseficaçon cultural ye un fenómeno que se bei por to l lhado. To ls dies hai lhénguas que déixan de se trasmitir, apágan-se i zaparécen. Para fazer afronta a esta rasa eigualizadora, las lhénguas minoritairas ténen que ber l sou ansino cada beç mais apuiado i zambolbido.

2. L mirandés ye ua lhéngua de l Nordeste de Pertual i pertence al grupo de las lhénguas románicas. Tubo ourige nun de ls romances peninsulares formados a partir de l lhatin bulgar, l stur-lhionés. Hoije ye ousada por 7000 falantes nua region cun cerca de 500Km², mais 5000 personas spalhadas por Pertual i pul restro de l mundo.

La formaçon desta lhéngua oubedece a un processo mui lhargo, cuntemporáneo de la formaçon doutras lhénguas peninsulares. Sobretodo a partir de l seclo XVI, quando Miranda fui eilebada a cidade, la lhéngua ampeçou a sufrir anfluénças amportantes de l pertués.

3. Esta lhéngua fui çcobierta pa la filologie peninsular na fin de l séclo XIX, çcrita i screbida pula purmeira beç pul sábio pertués Leite Vanconcelos. L filólogo Gonçalves Viana na fin de l seclo XIX fizo proposiçones cuncretas para fixar la sue scrita. Ye l sábio spanhol Menéndez Pidal[2] an 1906 que stabelece la sue filiaçon definitiba ne l stur-lhionés oucidental.

4. An 1995, un grupo de lhenguistas i de falantes de mirandés, cordenado pula Doutora Manuela Barros Ferreira de l Centro de Lhenguística del' Ounibersidade de Lisboua, ampeçou a trabalhar na normatizaçon moderna de la lhéngua mirandesa, apersentou i puso an çcuçon ua Porpuosta de Cumbençon Ourtográfica, i an 1999 fui eiditada la Cumbençon Ourtográfica de la Lhéngua Mirandesa[3].

5. Partindo dua einiciatiba de l deputado de l Partido Socialista, i mirandés, Júlio Meirinhos, la aprobaçon ounánime, pula Assemblé de la República, de la lei 7/99, de 29 de Janeiro de 1999, reconhece ls dreitos lhenguísticos de la quemunidade mirandesa i eileba l mirandés a la categorie de lhéngua oufecial de l Stado Pertués[4].

Ls artigos 3º i 5º desta lei lhíban a la necessidade de “regulamentar o direito à aprendizagem do mirandês, bem como o necessário apoio logístico, técnico e científico”. Ye neste ámbito que se anquadra l Çpacho Normatibo nº 35/99, que regulamenta l ansino de l mirandés nas scuolas de ls ansinos básico i segundairo.

II. L ansino de l mirandés

6. Zde hai seclos, siempre cumo lhéngua oural, l mirandés fui medrando nas aldés de l cunceilho de Miranda i Bumioso, sin scuolas adonde fura ansinado. Por tener quedado longe de la scuola, inda son mui poucos ls mirandeses que sáben screbir la sue lhéngua.

7. Podemos dezir que l ansino de l mirandés eiboluiu de maneira diferente antes i apuis de 1999, data an que fui aprobada la lei 7/99, de 29 de Janeiro, tamien chamada lei de l mirandés.

II.1. Antes de l' oufecialização de la lhéngua

8. An 1900 Leite de Vasconcelos ne l sou purmeiro tomo de ls Estudos de Philologia Mirandesa[5] alerta pa la necessidade de fazer antrar l ansino de l mirandés nun curso de filologie románica de forma a que ls porsores purmairos fússen formados i alertados pa l' amportaça de la perserbaçon de l mirandés anquanto lhéngua románica.

9. Antre 1926 i 1974 anquanto durou la ditadura faxista de l Stado Nuobo an Pertual, la política d’eiducaçon de l stado defendie l' eideia de “un stado, ua lhéngua”, al mesmo tiempo que retiraba to l prestígio a la lhéngua mirandesa[6] i proibie la sue outelizaçon drento de las paredes de las scuolas de la region[7].

10. An 1982 l uorgano de geston de la scuola segundaira de Miranda de l Douro apersentou ua petiçon al Menistério de l' Eiducaçon para lhebar por delantre la criaçon dua çplina d’oupçon de lhéngua mirandesa recebindo la seguinte respuosta: “Em referência ao V/ofício nº 573/82, de 12 de Novembro, respeitante à criação da cadeira optativa de Mirandês, informo V. Exª de que legalmente não é possível a introdução de disciplinas estranhas aos “curricula” em vigor para todo o País".

11. An 1985 l Dr. António Maria Mourinho i l presidente de la Cámara de Miranda de l Douro aperséntan ua nuoba porpuosta al Stado para ancluir l mirandés cumo çplina de oupçon nas scuolas de l cunceilho de Miranda. Desta beç, a títalo facultatibo i cun ua carga curricular de dues horas semanales, l Menistério de l' Eiducaçon outerizou la sue ancluson ne l plano curricular de l 5º i 6º anhos de scolaridade de las scuolas purparatórias de l Cuncelho de Miranda de l Douro.

Ne l seguimiento deste çpacho, l mirandés ampeça a ser ansinado pula purmeira beç ne l anho lhetibo de 1986/87, cumo çplina oupcional i extra-curricular[8], nas scuolas purparatórias de Miranda de l Douro i de Sendin, mas lhougo ne l percípio desse anho l ansino nun cunsigue ir por delantre na scuola de Sendin. L purmeiro porsor ye l Dr. Domingos Raposo.

12. Cumo çplina oupcional precária, de 1986 até 1999 l ansino de l mirandés cunfina-se als 5º i 6º anhos (2º ciclo de l ansino básico) de la scuola purparatória de Miranda de l Douro, tenendo ua adeson média de 25% de ls alunos matriculados nesses anhos l que faç ua média de 34 alunos por anho, repartidos por dous nibles cun ua turma an cada nible[9].

Nun hai ansino de l mirandés an to las outras scuolas de l cunceilho nin ne ls outros nibles d’ansino: pré-purmairo, 1º ciclo, 3º ciclo, segundairo, superior i formaçon de adultos. La çplina para lhá de ser oupcional, extra-curricular i nun tener manuales, era dada a l' última hora de Sesta-feira, quando ls alunos yá stában mui cansados i zmotibados.

II.2. Apuis de l' oufecializaçon de la lhéngua

13. Pula mano de l deputado socialista, Júlio Meirinhos, an 5 de Júnio de 1998, dá antrada na Assemblé de la República Pertuesa l porjeto de lei nº 534/VII – Reconhecimento oficial dos direitos linguísticos da comunidade mirandesa i a 29 de Janeiro de 1999 fui publicada la lei n.º 7/99 que reconhece oufecialmente ls dreitos lhenguísticos de la quemunidade mirandesa, ampeçando a bigorar ne die 1 de Márcio de 1999.

Segundo l artigo 2º de la lei, “É reconhecido o direito da criança à aprendizagem do mirandês, nos termos a regulamentar”. La regulamentaçon deste artigo fui feita pul Çpacho Normatibo nº 35/99, de 5 de Júlio, de l Menistro de l' Eiducaçon. Este Çpacho Normatibo an beç de regulamentar l dreito i acesso al ansino de la lhéngua mirandesa, apunta sobretodo no sentido de lhemitar esse mesmo ansino[10].

14. Ne l anho lhetibo de 1999/2000 funciona an Miranda, ne l polo de l' Ounibersidade de Trás-ls-Montes i Alto Douro, un curso lhibre de mirandés antegrado ne l mestrado an Ansino de la Lhéngua i Cultura Pertuesa, lhecionado pul Dr. Domingos Raposo a ua turma de 24 alunos.

15. Ne l anho 2000 seis porsores mirandeses frequentórun l curso de lhéngua sturiana de l' Academie de la Lhéngua Sturiana, an Cangas del Narcea.

An Sendin, durante l fin-de-semana de 28 i 29 de Outubre, l Dr. Amadeu Ferreira lhecionou un curso de formaçon antensibo de níble eilementar i deregido a to la giente, i que tubo ua partecipaçon de 50 personas.

Tamien an 2001 ye aprobado pul Menistério de l' Eiducaçon un projeto apersentado por mi, para ansinar la lhéngua mirandesa ne ls nibles[11] todos de l agrupamiento de scuolas de Sendin i scuola segundaira de Miranda de l Douro. Desta forma stende-se l ansino de la lhéngua mirandesa a mais scuolas i mais nibles.

16. Ne ls anhos lhetibos de 2000/2001 i 2001/2002 na Ounibersidade de Trás-ls-Montes i Alto Douro (UTAD) de Bila Real, funcionou ne l Departamento de Lhetras un Curso Lhibre de Mirandés cun 56 alunos, lhecionado pul Dr. Domingos Raposo.

An Júlio i Agosto de 2001, ne l pólo de Miranda de l Douro de la mesma Ounibersidade funcionórun ls purmeiros cursos ounibersitários de Berano de lhéngua i cultura mirandesa.

17. An 2001 ye feita por mi ua perposiçon para stender l ansino de l mirandés a la scuola pré-purmaira de Sendin i a la scuola de l 1º ciclo de Palaçuolo, mas nun son reunidas cundiçones que possebelíten esse abanço. Tamien nesse anho ampeça a funcionar l ansino de cultura i folclor mirandés na scuola de l 1º ciclo de Miranda de l Douro, mas ne l anho seguinte ye abandonado.

18. Zde l anho 2002 que ne l pólo de Miranda de l Douro de l' Ounibersidade de Trás-ls-Montes i Alto Douro (UTAD) l Dr. Domingos Raposo tén lhecionado ua çplina oubrigatória de mirandés a ua turma de 25 alunos de la Lhicenciatura an Antropologie Aplicada al Zambolbimiento.

Lhecionados pul Dr. Amadeu Ferreira, tamien a partir de 2002 l' Associaçon de Lhéngua Mirandesa ourganizou um curso de mirandés an Lisboua, cun ua duraçon de un, dous ou trés anhos, para ua turma de cerca de 15 alunos.

19. No anho lhetibo de 2003/2004 l Dr. Duarte Martins alarga l ansino de l mirandés a la scuola secundaira de Miranda de l Douro i pré-purmaira de Sendin[12].

20. An 2003 fui feito un pedido a la Direçon Regional d’Educaçon de l Norte (DREN) dun tiempo lhetibo pa la scuola EB1 de Palaçuolo (cun 15 anscriçones), un tiempo lhetibo pa la scuola EB1 de Fuonte Aldé (cun 3 anscriçones), dous tiempos lhetibos pa la scuola EB1 de Malhadas (cun 22 anscriçones) i un tiempo lhetibo pa la scuola EB1 de Dues Eigreijas (cun 4 anscriçones), mas fui dada ua repuosta negatiba.

21. Apuis de l' aprobaçon de la lei de l mirandés l ansino desta lhéngua tubo abanços amportantes stendendo-se a to ls nibles d’ansino, quier dezir, de l pré-purmairo al ounibersitário, passando pula formaçon d’adultos[13].

An termos territoriales l ansino deixa de star cunfinado a la cidade de Miranda de l Douro i passa tamien a fazer-se na bila de Sendin, Bila Real, Lisboua.

22. L ansino de l mirandés cuntina a ser ua çplina d’oupçon i extra-curricular. Nanhun de ls porsores a ansinar mirandés biu até hoije las sues ‘habelitaçones próprias’ defenhidas i reconhecidas por qualquiera anstituiçon que seia. Para ansinar la çplina, ls porgramas i manuales inda nun eisísten de forma armonizada, outelizando cada porsor ls que el próprio eilaborou. De la mesma maneira nanhun porsor puode tener acesso a ua carreira profissional d’ansino.

Tamien nun eisiste nanhue anstituiçon que cordene l ansino desta lhéngua, funcionado las cousas de maneira mui ad-hoc.

III. Perspetibas feturas

23. Ye perciso fazer fuorça para que ne ls próssimos dous anhos lhetibos l ansino de l mirandés steia persente an to las scuolas i nibles d’ansino de l cunceilho de Miranda de l Douro, assi cumo an formaçones d’adultos.

Ye necessáiro armonizar ls porgramas i ampeçar a trabalhar na eilaboraçon de manuales. L ansino ambora nun sendo oubrigatório ye amportante que steia antegrado ne ls porgramas curriculares propuostos pulas scuolas de l cunceilho.

Ye de grande amportança eilaborar protocolos cun bárias ounibersidades para ansinar l mirandés ne l nible ounibersitário.

24. Quier seia an termos de la dibersificaçon de l’oufierta ó d’oumento de la culidade, para zambolber l ansino de l mirandés, ye perciso ua gana política fuorte. Purmeiro de la parte de la Cámara Municipal de Miranda de l Douro i depuis de las antituiçones de l' administraçon central de l Stado Pertués, subretodo l Menistério de l' Eiducaçon.

La Cámara Municipal de Miranda de l Douro ten stado alhena a este processo i por bezes mesmo contra, assumindo ua postura crítica an relaçon a la defesa i necessidade de l ansino de l mirandés. Desta forma l Menistério de l’Eiducaçon de l Stado Pertués nun percisa mostrar-se colaborante, pus para estes serbiços l ansino de l mirandés ye bisto cumo un gasto a eibitar.

IV. Cunclusones

25. L ansino de l mirandés tudo un zambolbimiento[14] amportante ne ls últimos 20 anhos, subretodo apuis de l reconhecimiento de l mirandés cumo lhéngua oufecial de l Stado Pertués an 1999.

26. Nun mos podemos squecir que l ansino de la lhéngua mirandesa ye hoije menistrado nun ambiente scolar tri-lhéngua: pertués, mirandés i anglés. Quanto mais temperano la criança tubir acesso al cuntato cun este ansino, maior será la solidificaçon de ls cuntenidos menistrados i maior será l prestijo atribuído a la lhéngua regional.

27. Ambora de forma eirregular i custituindo einiciatibas puntuales eizoladas, l ansino de l mirandés ten stado persente an to ls nibles d’ansino i passou a ser ansinado an mais sítios para alhá de la cidade de Miranda.

28. Para passar de la fase d’ansino lhiada mais al folclor que al berdadeiro ansino de la lhéngua mirandesa ye perciso ambestir an formaçon de porsores, dotar l mirandés de berdadeiras anstituiçones de la lhéngua i ua buntade política fuorte por parte de la Cámara Municipal de l cunceilho de Miranda.

Tresformar l’oufierta oupcional extra-curricular an oufierta oupcional curricular, armonizar ls porgramas i proponer manuales ye fundamental para poder dar un salto qualitatibo ne l ansino de l mirandés.

Sendin an Tierra de Miranda, 24 de Márcio de 2004

carlin_bandarra@yahoo.com

----------------------------------------------------------------------
Notas
[1] Carlos Ferreira naciu an Sendin an 1961. Ye Geógrafo, lhicenciado pula Ounibersidade Nuoba de Lisboua (1986) i porsor de mirandés an 2000/2001 i 2001/2002. Ten bárias obras publicadas i scritas an mirandés. Ye Mestre pula Ounibersidade de Salamanca (2003) i la sue tese de Grado ye la purmeira tese ounibersitária scrita an lhéngua mirandesa: “Toponímia, Paisage i Ambiente, Ua abordaige geotoponímica de Sendin an Tierra de Miranda (Un studo de giografie rural i regional) 610 páginas.
Atualmente ye doutorando de l’Ounibersidade de Salamanca, sendo l assunto de la sue tese: “Modelos de probamiento i modelos de zambolbimiento pa la Tierra de Miranda”.
[2] MENÉNDEZ PIDAL, Ramon (1990) El Dialecto Leones, Leon: Diputación Provincial de León, 12-13.
[3] FERREIRA, Manuela Barros/RAPOSO Domingos (coord.) (1999) Convenção ortográfica da língua mirandesa, Miranda do Douro/Lisboa: Câmara Municipal de Miranda do Douro/Centro de Linguística da Universidade de Lisboa
[4] Ber subre la queston, FERREIRA, Amadeu (2003) “Statuto Jurídico de la Lhéngua Mirandesa” In. Ciemen, Drets Lingüístics, Anclabes lhenhuisticos na Ounion Ouropeia (2003)65-86.
[5] VASCONCELLOS, José Leite (1900) Estudos de Philologia Mirandesa. Bol. I. Lisboa Imprensa Nacional. (Eidiçon de la Cámara Municipal de Miranda de l Douro 1992), página 162.
[6] Dezie-se que nun era ua lhéngua mas si un pertués deformado i mal falado que era perciso corregir, eibitar i eiliminar a todo l custo.
[7] Chegórun até nós alguns relatos que cúntan l rigor i smero cun que ciertos porsores purmairos lhebában a cabo essa tarefa. Por eisemplo un porsor que ansinou na scuola purmaira de Caçareilhos durante muitos anhos de l seclo XX, eiliminou quaije por cumpleto la lhéngua mirandesa nessa lhocalidade.
[8] Dues horas semanales por nible.
[9] La carga letiba ye de dues horas semanales por turma.
[10] Ber FERREIRA, Amadeu (2003) “Statuto Jurídico de la Lhéngua Mirandesa” In. Ciemen, Drets Lingüístics, Anclabes lhenhuisticos na Ounion Ouropeia (2003)79-80: “Quédan, assi, de fuora las crianças de las crexes i jardins d’anfáncia” (...) “ua segunda lhemitaçon de l dreito a daprender la lhéngua: solo ténen esse dreito ls alunos de las scuolas de l cunceilho de Miranda de l Douro” (...) “Ua terceira lhemitaçon ye dada ne mesmo númaro 1 de l Çpacho quanto al tipo de ansino a menistrar: daprender la lhéngua mirandesa nas scuolas solo puode ser feito como vertente de enriquecimento do currículo, quier dezir, cumo algo que stá fuora de l currículo scolar i, portanto, apartado pa l rol de las cousas que son anteressantes mas nun son amportantes nin decisibas al punto de stáren ne l curriculum. Sin ua antegraçon curricular, la lhéngua mirandesa sufre las cunsequenças: culs piores hourários, cul mínimo númaro de horas, cun ua total zbalorizaçon de l sfuorço de ls alunos, cun un zprézio anstitucional pula lhéngua que ye tamien ua chamada scundida al çprézio puls alunos.
Bistas, resumidamente, todas las lhemitaçones de l nº 1 de l Çpacho al ansino de l mirandés apúntan para ua situacion d’eilhegalidade, por biolaçon de la lei 7/99 i, tamien, de la Custituiçon.”.
[11] 1º ciclo (50 alunos), 2º ciclo (39 alunos) i 3º ciclo (14 alunos) de l ansino básico.
[12] Actualmente este porsor ansina ne l agrupamiento de scuolas de Sendin (pré-purmaira, 1º ciclo, 2º ciclo i 3º ciclo) i na scuola secundaira de Miranda de l Douro (3º ciclo i segundairo).
[13] Formaçon d’adultos çponible an 2004: Associaçon de Lhéngua Mirandesa an Lisboua, polo UTAD de Miranda.
[14] Cursos çponibles an 2004: pré-purmaira (Sendin), purmaira (Sendin), 2ºciclo (Miranda i Sendin), 3º ciclo (Miranda i Sendin), segundairo (Miranda), ounibersitário (UTAD Miranda), formaçon d’adultos (Associaçon de Lhéngua Mirandesa an Lisboua, UTAD – Miranda).

ENSINO (2)

Stado actual, necessidades i perspetibas ne l ansino de l mirandés

Poesia do mundo (4)

Nino

Ensino do Mirandês (1)

Cursos e docentes por ordem cronológica

Domingos Raposo

Poesia do mundo (3)

Agora